氣候轉變，全球暖化，水位上升，全球急急腳制定減碳排放目標。香港九成耗電及超過六成碳排源自建築物，盡地球村公民責任減排，買樓要買環保樓。「哦！我住飛鵝山，水位升唔到我住嗰度，唔關我事。再講，乜野係環保樓？」
乜野係環保建築？有人話:「即係响天台裝大陽能板、風車，用再生能源發電。但我住十四樓冇天台，冇得攪。」「攪綠化、種多啲樹。天台種幾棵大樹或鋪上綠化草皮，外墻裝置綠化墻、掛花盆。不過管理費好貴，颱風時樹可能會塌、植物會好易死，最惨就係多蚊。」「公司冷氣凍到要著棉襖，出面秋高氣爽但又唔可以熄冷氣開窗，點樣環保？」「個智能家居裝置太複雜，我阿媽唔識用，拆咗。仲有隻窗又大又重，莫講洗窗難，平時閂窗要出盡九牛二虎之力，都係唔開多。」「洗手間改裝慳水龍頭及馬桶。不過沖得唔乾淨，吓吓㩒兩次先得，好似仲嘥水。」「冇錢、冇時間，下次先考慮環保。」
打個譬如，根本沒有環保建築，只有環保生活而建築配合。建築源於生活，儘管建築附上最先進環保技術或裝置，難明難用也只淪為藝術品或被陳述為環保建築。相反，建築應該忠於基本法則 - 因地制宜、物盡其用、以人為本。所以最好的環保建築便是不知不覺地改變你的生活習慣，達至節約能源、減少碳排放，使你健康、愉快，與大自然共融。
再簡單來說，以節能家居為例，全年少於三分一時間需要開冷氣，但仍然保持舒適居住環境。重點在於設有足夠可開啓的窗户，其窗户大細及位置有助對流通風效果; 採用隔熱不隔光玻璃; 外牆配上合適擋陽裝置，阻隔猛烈陽光直射入屋之餘，下雨天可擋雨以便開窗通風; 裝置吊扇最有效於過渡性季節減少開冷氣需要; 最後當然要選用高效能冷氣系统。
物盡其用方面，需要大家改變觀念，反樸歸真、用得其所。例如，每天花不上兩至三分鐘時間經過或逗留地下入口大堂，真的有需要豪華雲石裝飾配上價值不菲的水晶吊燈及羅馬柱？多層次種植綠化，引入陽光、自然風也是一個選擇。
唔一定要講大仁大義，環保樓最基本係可以令你少交電費、水費、醫療費。當然，你要選擇環保生活態度。倘若你鍾情開大冷氣打邊爐或者蓋住綿被嘆冷氣，就算冷氣機是一級能源標籤和建築設計達到鉑金級綠建環評，建築環保與否還有意義嗎？
兩度@建築平台
此文章刊載2016年3月《HK01 -建築平台》
